LEGAZPI CITY-Pigpreparar na kan Albay veterinary office an mga “polling site” o an evacuation area kan mga apektadong livestock o ataman na hayop na nasa 6km permanent danger zone kan Bulkang Mayon.
Segun kay Albay Provincial Veterinarian Dr. Pancho Mella, sa intrevista kan Bombo Radyo Legazpi na sa presente nagkakaigwa sinda nin beripikasyon kan mga polling site kun sain ilalaag an mga ataman na hayop.
Pighahanda ninda ini katuwang an mga lokal na gobierno enkaso maglangkaw pa an alert level kan Bulkang Mayon.
Nakapaglibot na man suboot an saindang grupo sa mga lugar sa Albay kabale an San Fernando, Fidel Surtida, Lidong, Tumpa, Soa, Muladbucad Grande, Muladbucad Pequeño, Masarawag, Maninila, asin Doña Tomasa.
Nakapag-update na man sinda nin inventory manungod sa mga listahan kan mga apektadong livestock kun sain nasa 833 an mga karabaw, 1, 081 naman an Baka, 1002 na orig, 4, 706 na mga native chicken.
Kabale man an nasa 92 kambing, 75 pato, 35 na Turkey, 8 Kabayo, asin sarong Tupa kun sain nasa labi 7,000 na livestock asin 892 na mga farmers an apektado.
Dugang pa kan opisyal na kinakaipuhan ini huli sa pwedisir ma-ingest o ma-inhale ninda an abo hale sa Bulkan na posibleng magkawsa nin impeksiyon sa sainda.
Pinaka-obheto kan saindang lakdang an animal welfare asin kaayusan nganio magkaigwa nin mortality an mga ataman na hayop.
Abiso kan opsiyal sa gabos na famers na magkooperar sa sainda ngani maprotehiran an saindang mga kabuhayan.
