LEGAZPI CITY — All set na an ciudad kan Legazpi sa piglalaomang pag-abot kan mga Miss Earth 2018 Goddesses katakod kan isasagibong swimwear competition asin gala night urog na sa pagbisita sa manlain-lain na orgulyong lugar sa Albay.
Sa intrevista kan Bombo Radyo Legazpi ki City Tourism Officer Pita Pacres, inasegurar kaining magi-enjoy an mga magagayon na daraga sa two-day visit puon Oktubre 20 hasta 21.
Tampok sa mga importanteng events na papartisiparan kan nasa 30 kandidata an mangrove tree-planting sa banwaan kan Sto. Domingo, abaca weaving sa Bacacay, coastal clean-up sa Legazpi City asin tree-planting sa Tabaco City.
Mabubusog man an mga kandidata sa ihahatag na katakam-takam na mga pagkaong Bicolano kasabay kan paghiling sa Bulkang Mayon sa Cagsawa mantang tutukduan pa an mga ini na magluto kan masiram na Pinangat sa Camalig asin Longganisa kan Guinobatan.
Mientras tanto mahigot suboot an magigin laban ngonian na taon segun ki Missossology founder asin pageant enthusiast Ric Galvez huli sa ‘unpredictable dynamics’ kan pageant.
Kaibanan sa matatanog na pangaran na mag-uli kan korona an mga kandidata hale sa Poland, Puerto Rico, Spain, Serbia, Ukraine, Korea, Mexico, Guam, Peru, Crimea, Chile, Portugal asin an frontrunner kan Pilipinas na si Celesti Cortesi.
Sa aga naman an isasagibong Press Presentation kan mga kandidata sa pool side kan Diamond Hotel Philippines bandang alas-10:00 nin aga.
