LEGAZPI CITY – Nagpasalamat an Albay Schools Division Office sa mga atleta huli sa impresibong performance kan provincia sa pagtatapos kan Palarong Bicol 2025.
Segun ki Department of Education Schools Division Office Albay Spokesperson Froilan Tena sa intrevista kan Bombo Radyo Legazpi na nahiling ninda sa tally na maski unofficial pa, posibleng magtenir sa primerong pwesto an provincia huli ta natapos na an natatadang mga kawat.
Sa pagkakarumdom niya man na inabot nin haros 14 taon nganing makabawi an provincia nganing mangibabaw sa medal tally.
Nagbunga man suboot an mga pigsasagibong training kan mga atleta kada matapos an mga klase kaini.
Pigtaram pa kan opisyal na nagin dominante man an Albay sa athletics asin arnis na kun sain nakapagtao nin poco mas o menos 20 na bulawang medalya.
Nagdeklara asin nag-identipikar na man an DepEd region 5 kan mga atleta na ipapanglaban kan kabikolan para sa paparaning palarong pambansa.
Wara man na magabat na nangyari sa mga kawat, billeting center, asin iba pang mga isinagibo sa enterong durasyon kan pakawat.
Nagpaabot man si Tena nin dakulang pasasalamat sa mga atleta, mga magurang kaini, mga teacher asin coaches na nagpagal asin nagdaplos nganing makuwa sana an pagigin numero uno kan provincia kan Albay sa Palarong Bicol 2025.
