LEGAZPI CITY – Pigpapa-iimbestigaran na kan Schools Division Office Albay an mapadapit sa suboot bullying incident sa laog mismo kan Daraga National High School na pigka-imbweltuhan kan parehong menor de edad na biktima asin suspek.
Segun ki Schools Division Office Albay Spokesperson Froilan Tena sa intrevista kan Bombo Radyo Legazpi na nakikipagkoordinar na sinda sa manhamiento kan imbweltong eskwelahan nganing maaraman kun ano an resulta kan saindang imbestigasyon.
Kinondena niya man an nagruruluwasan na video sa social media kan suboot nangyaring insidente asin nangapodan na halaton na sana an pormal na desisyon base sa piggigibong imbestigasyon kan eskwelahan urog nang mag-oorolay an mga imbwelto sa insidente.
Nagsairarom na man sa medico-legal an biktima asin digdi napag-araman na physical assault an nangyari.
Pigtaram pa kan opisyal na posibleng isairarom sa psychosocial interventions o counseling an duwang imbweltong lado mantang pigbeberipika pa kun estudyante kan nasambitang eskwelahan an pigtutukdong suspek.
Sa presente, ini suboot an primerong bes na may pinakamalalang insidente nin bullying sa pampublikong eskwelahan sa provincia kan Albay ngonian na taon.
Abiso ni Tena sa mga eskwelahan na isyerto an seguridad sa mga eskwelahan, irequire an pagsusulot nin ID asin uniform nganing malikayan an mga kaparehong insidente.
