LEGAZPI CITY- Pinahigot ngunyan kan Albay Schools Division Office an safety protocol sa mga eskwelahan kasunod kan nangyaring shooting incident sa sarong eskwelahan sa Tacloban City.
Segun ki Albay Schools Division Office Spokesperson Froilan Tena sa intrevista kan Bombo Radyo Legazpi na pigtututukan man an mga insidente nin bullying siring kan nairehistro sa nagkapirang mga eskwelahan sa nakalihis na mga panahon.
Napag-araman na igwang mga polisiya na pigi-implementar alagad magkakaigwa sana nin mas istriktong mga lakdang.
Nabanggit man kan opisyal na tulong taon nang nagigibo an ahensya nin legal caravan kun sain pigki-cater an teaching asin non-teaching personnel asin youth caravan man para mga learners na nasa Grade 9 hasta Grade 11.
An legal caravan an nagtataong atensyon sa mga insidente nin teacher to teacher harassment o teacher to student harassment o vice versa.
Sa ibong na lado, sakop man kan youth caravan an mga insidente nin bullying.
Mientras tanto, sinabi man ni Tena na dapat gabos na mga eskwelahan an igwang watchman ngani na magmo-monitor sa mga estudyante huli ta aminado ining dae na kaya kan mga paratukdo na i-check ang gamit kan mga estudyante.
