LEGAZPI CITY – Pakiolay kan Albay Provincial Police Office sa publiko na magkaigwa sa lambang harong nin suway na kwarto para sa mga aki urog na para sa mga babayi.
Ini ngani suboot maibitaran an mga kaso nin panlulugos espesyalmente an incest o an pang-aabuso kan sadiring kaparientes.
Sinabi ni PCI Arthur Gomez, tagapagtaram kan Albay PNP na pigtututukan ngunyan kan kapulisan an pagbisita sa mga barangay ngani na mag-impormar sa mga pamilya urog na sa mga lalaki katakod kan mga pwedesir na mangyari tuyong buyong siring na man an pagpatanid dapit sa krimen na rape.
Sigon pa ki Gomez, an probinsya kaya kan Albay an binansagan na “Rape Capital of the Philippines” huli sa dakol na kaso nin pang-aabuso sa mga babayi.
Partikular suboot an probinsya sa incestuous rape kun sain nalulugusan an mga menor na babayi kan sadiri man sanang ama, tugang, pinsan o amaon.
Kun kaya propuesto kan PNP sa lambang pamilya na magkonstruhir nin separadong igdaan o sanglian na igwa nin dibisyon ngani na maibitaran an tentasyon sa mga nag-uuling buyong na kaparientes.
