LEGAZPI CITY – Kinondenar man kan Provincial Tourism, Culture and Arts Office an ginibong pambabastos kan pirang content creators sa “Green Lava” sa Barangay Mi-isi, Daraga, Albay.
Segun ki Albay Provincial Tourism, Culture and Arts Office Head Dorothy Colle sa intrevista kan Bombo Radyo Legazpi na dapat irespeto kan siisay man an mga kagayunan kan atraksyon urog nang nag-trending sa social media an pangyayari.
Pigkokonsidera ninda an insidente na “disrespect” bako sana sa kagsadiri kan atraksyon kundi pati na man sa lambang albayano.
Mawot na sana kan opisyal na dae na mautro pa an kaparehong pangyayari sa maski sain man na atraksyon kan provincia.
Pwedesir man suboot matukar an insidente sa saindang Tourism Council Meeting nganing magibuhan na man ini nin mga resolution mantang nasa hurisdiksyon man kan Lokal na gobierno an pagpapataw nin padusa para sa mga imbwelto.
Nauugma man si Colle sa mga turistang nagpapasiring sa provincia kan Albay nganing aprobitsaran an saindang mga tourist attraction alagad hagad man ninda giraray an pagrespeto nganing maibalik man sainda ini kan mga albayano.
Mientrastanto, pormal na man naghagad nin dispensa sa saindang mga social media an mga indibidwal na imbwelto sa nasabing pambabastos sa Green Lava.
