LEGAZPI CITY – Padagos an pigsasagibong preparasyon kan mga kapulisan sa provincia kan Albay mapadapit sa nagdadangadang na pag-obserbar kan Undas ngonian na taon.
Segun ki Albay Police Provincial Office Deputy Provincial Director for Operations Police Lieutenant Colonel Arthur Tagtag sa intrevista kan Bombo Radyo Legazpi na nagkondusir na sinda nin serye nin meeting mapadapit sa pagmamantenir kan pazy orden provincia.
Nakalatag na man an mga personnel na ibubugtak sa mga kamposanto asin iba pang lugar kun sain nakatalaan an deployment sa maabot na Oktubre 29 asin madurar sa Nobyembre 3 nganing matawan nin asistensya an mga ma-amay asin mahabol sa pagbisita kan saindang namaaram na mahal sa buhay.
Plano man nindang magbugtak nin dakol na kapulisan sa ciudad kan Legazpi huli sa dakol kan tawo siring man sa Tabaco City, asin Oas huli sa dakol an mga sementeryo.
Pigtaram pa kan opisyal na afuera sa mga kamposanto an mabugtak man sinda nin police visibility sa mga terminal, pantalan, asin aeropuerto.
Nakipagkoordinar na man an mga kapulisan kan lambang ciudad asin munisipalidad sa mga manhamiento kan mga sementeryo para sa preparasyon asin pagkakasararo sa pagmamantenir kan katuninongan sa kabilugang durasyon kan Undas.
Siring suboot kan Undas kan nakaaging taon, mahigot nindang ipinagbabawal an pagdadara kan arak, pag-iinom sa laog nin kamposanto, pagdadara nin mga kontrabando arug kan matarom na bagay, badil asin iba pa.
Nagmamawot man si Tagtag na mairerehistro kan Albay PPO an zero crime incident sa bilog na durasyon kan Undas 2025 sa enterong provincia.
