LEGAZPI CITY- Preparado na an Albay Police Provincial Office para sa posibleng pagtama kan bagyong Pepito sa rehiyon kan Bicol.
Sa intrevista kan Bombo Radyo Legazpi ki Albay PPO Provincial Director PCol. Julius Añonuevo, sinabi kaini na nakipag koordinar na sa lambang hepe kan kapulisan sa provincia ngani na tulos na makapag-andam sa nasabing raot nin panahon.
Inasegurar man kan opisyal an kahandaan kan kapulisan para sa posibleng maging sitwasyon asin epekto sa lambang mga namamanwaan.
Napag-araman na nagtao na man nin direktiba an Police Regional Office 5 sa mga personahe na i-secure na an saindang mga pamilya asin maging mga pagrugaring huli sa oras na pagtama kan bagyo an dagos na ining maresponde sa mga indibidwal na kaipuhan nin rescue sa oras kan kalamidad.
Ipapautob na man ngunyan na aldaw an full alert status para sa gabos na mga personahes kan kapulisan.
Maabot man sa 700 na mga personahes an ilalatag para sa augmentation sa mga lugar na maapektaran.
Mientras tanto kapot na man kan Albay PPO an listahan kan mga banwaan asin barangay na prone sa pagbabaha, landslide asin maging sa mga coastal areas sa probinsya.
