LEGAZPI CITY- Maduon na pinahimutikan kan Albay Police Provincial Office na nagkakaigwa nin kapabayaan an saindang lado sa pagpuho nin iligal na sugal sa provincia.
Ini an kasunod kan nagin akusasyon ni Ako-Bicol Party list Representative Alfredo Garbin Jr. na suboot kapabayaan kan law enforcement kaya talamak na naman an jeueteng sa provincia kan Albay.
Segun ki Albay Police Provicial Office Public Information Officer Police Lt. Col. Luisa Tino sa Bombo Radyo Legazpi na seryoso an kapulisan sa paglaban sa anuman na klase nin iligalidad.
Katunayan, pinakahuring operasyon suboot an nangyari kan nakalihis na bulan kun sain maabot sa 30 na indibidwal an naarestar sa anti-illegal gambling operations sa pinagtutubudan na jueteng hub sa Daraga, Albay.
Nanindugan an opisyal na puon kan magtukaw sa pwesyo si Albay PPO Provincial Director Col. Noel Nuñez, saro sa mga enot na direktiba kaini sa mga chief of police an pagpapakusog kan kampanya kontra sa iligal na sugal.
Mientras tanto, nangapudan man si Tino sa publiko na makipagtabangan sa kapulisan sa paagi kan pagpapaabot nin impormasyon kun igwang presensya nin iligal na sugal sa saindang komunidad ngani na tulos ining maaksyunan.
