LEGAZPI CITY — Nagpaluwas nin pagirumdom an Albay Provincial Police Office (PPO) sa mga motorista kun pano maiibitaran an aksidente sa tinampo na ipigkokonsiderar na may pinakadakol na kaso sa laog nin duwang taon partikular na durante kan rush hours sa probinsya.
Segun ki Chief Insp. Arthur Gomez, tagapagtaram kan Albay PNP, uminabot sa 3,604 an nairehistrong kaso kan vehicular accidents kan 2015 kun saen nangyari an pinakadakol na kaso kan bulan kan Abril asin Agosto.
Kan taong 2016, nadugangan an aksidente sa tinampo na buminadol sa 3,823 kun saen sa parehong bulan liwat an may pinakadakol na kaso.
Ineksplikar pa ni Gomez na kasabay sa tulong mayoryang kawsa kan aksidente an “distracted driving, dae pag-slow down kan mga drayber sa pedestrian lanes asin salang pag-overtake.
Sa kaso kan distracted driving, naiimbwelto an driver sa paggamit nin cellphone o nagdadangog nin tugtog gamit an headphones o earphones.
Nakakontribwir man an mga driver na dae nagpapaluya nin dalagan sa pedestrian lanes sa intersections, school asin church zones asin sa hampang nin mga mall.
Dugang kaini na sa ibang kaso, an mga driver na imbwelto sa aksidente an basta sanang pag-overtake urog na sa double yellow lanes o sa “no overtaking” signs asin minsan maski may kasabat na behikulo sa ibong na linya.
Apwera sa tulong kawsa na ini, yaon man an overspeeding, mechanical problems kan behikulo, nagmamanehar na nakainom asin minsan huli sa mga ligaw na hayop na nagbabalyo sa tinampo.
