LEGAZPI CITY- Tinawan duon kan Albay PNP na mahigot asin seryoso na ngunyan an pulisya sa pagdakop sa mga imbwelto sa illegal gambling susog na man sa kasuguan ni Presidente Rodrigo Duterte asin PNP Chief Director General Ronald Dela Rosa.
Sinabi ni PCI Arthur Gomez, tagapagtaram kan Albay PNP na nakatutok sinda ngunyan sa pagkundusir nin mga anti-illegal gambling operations.
Katakod kaini, nagpatanid si Gomez sa publiko na isagibo sana an pagbulang nin manok o tupada sa mga ligal o otorisadong lugar.
Kun para man suboot sa pyesta, kaipuhan kan barangay na magkua nin permit tulong aldaw antes an selebrasyon alagad sa legitamate cockpit arena man giraray dapat na isagibo an sugal.
Klinaro pa ni Gomez na iligal asin dadakupon kan mga pulis an gabos na sugal na igwa nin imbweltong kwarta o taya alagad dae nin magkakanigong permit.
Mientrastanto, sa ngunyan bako pa suboot malinaw kun pwedesir pang mag-operate an meridian gaming na igwa nin permit na hasta sa Disyembre 2017 o an bagong Lucky 5 enterprise corporation na sana an tutugutan na authorized agent kan Philippine Charity and Sweepstakes Office (PCSO.)
Sa ngunyan, sinabi ni Gomez na pighahalat pa ninda an opisyal na memorandum gikan sa Kampo Crame.
Katakod man giraray ini kan idineklarang “all out war” ni Presidente Duterte kontra sa iligal na sugal.
