LEGAZPI CITY — Pighahalat pa kan Albay Police Provincial Office an pormal na kasuguan dapit sa pagpirma ni Presidente Rodrigo Duterte kan Executive Order No. 26 na nagbabawal sa paninigarilyo sa mga pampublikong lugar asin sa mga saradong establisimiyento apwera sa mga pig-aapod na ‘designated smoking areas (DSAs).
Sa intrevista kan Bombo Radyo Legazpi ki Albay PNP spokesperson PC/Insp. Arthur Gomez, kinakaipuhan man giraray na isairarom an kapulisan sa orientation sa paagi kan Regional Legal Service kan PNP tangarig na urog na magin epektibo an implementasyon kan ley.
Nagtutubod man an opisyal na bako na marhay dipisil an pagpapaotob kaini sa Albay partikular na sa ciudad kan Legazpi na haloy nang nagpapaotob kan smoke-free ordinance.
Positibo man suboot an nagin epekto kaini sa lugar dawa pa kaitong punan huli sa pinangangarugan na kan iba pang mga provincia na nagbisita digdi.
Mientras tanto, inabisuhan man kaini an publiko na tulos na ireport kun en kaso makahiling nin mga nagbabayolar sa ipinapaotob na ley tangarig na tulos matawanan nin magkaanigong aksyon.
