LEGAZPI CITY-Pigsisierto kan Albay Provincial Health office (PHO) an saindang preparasyon maungod sa ospital asin bulong enkaso magsakat pa sa alert level 4 ang estado kan Bulkang Mayon.
Segun kay Albay Provincial Health Office Head Dra. Estella Zenit sa intrevista kan Bombo Radyo Legazpi, naka-code white alert na sinda poon pa kan magsakat sa status kan Mayon sa katahawan kan saindang coordination meeting.
Nakapag-organisa na man an saindang ahensya mapadapit sa mga pangangaipohan kan mga residentes sa evacuation center siring kan water asin sanitation, mental health asin psychosocial support karibay kan saindang minimal service package na pinagbabantayan kan saindang rapid health assessment team.
Nagiikot na man suboot an saindang mga personahes sa primero distrito, ikaduw asin pantulong distrito kan Albay ngani makapagtao nin mga basic asin assorted na mga bulong.
Dugang pa kan opisyal na pigpreparar na man an mga ospital asin mga lokal na gobierno na laog sa 8km danger zone kun sain posibleng pagdarahan nin pasyente.
Pigaayos na man suboot an mga referral system ngani mapadali an pagpapadara kan mga posibleng pasyente sa naunambitang mga ospital.
Ipighayag man niya na kadaklan sa mga helang na nakukuwa sa mga evcuation center iyo an Upper Respiratory Tract Infection (URTI) o diarrhea na posibleng kawsa kan ashfall o an pagigin crowded sa lugar.
Karibay kaini, pigsierto kan ahensya na bastante an saindang suplay nin bulong huli sa dai nawawaran nin stockpile para sa disaster response.
Nagpopoon na man sinda sa pagtatao nin mga hygiene kits asin N95 na facemask para mga evacuees.
Abiso kan opisyal sa gabos na nakahanda an saindang ahensya ngani tabangan an mga pangangipohan sa salud kan mga apektadong residentes.
