LEGAZPI CITY—Nagpatanid an Albay Provincial Health Office sa publiko mapadapit sa posibleng makuang helang huli kan pagbabaha asin pag-uuran sa probinsya.
Segun ki Provincial Soil Transmitted Helminthiasis (STH) Control Program Coordinator Anthony Ludovice, sa intrevista kan Bombo Radyo Legazpi, na maglikay sa mga maaati na tubig na posibleng makua sa exposure sa mga inumon na kontaminado na posibleng magkawsa nin diarrhea, cholera asin iba pang water-borne diseases.
Tinawan-doon man kaini an mga helang na pwedesir na makua sa baha asin pag-uuran na pig-aapod na “WILD” o an water-borne diseases, influenza, leptospirosis, asin dengue.
Sa ngunyan wara pa man sindang nareresibing mga report mapadapit sa nasambitang mga helang.
Dugang kan opisyal na sa pakikipagkoordinar kan saindang opisina sa Department of Health, nakapreparar na man an mga bulong na posibleng gamiton sa leptospirosis, diarrhea, asin iba pa.
Nagkrear na man sinda nin mga flyers, brochures, asin leaflets para iheras an sa mga residentes an mga impormasyon na posibleng makuang helang kawsa kan pagbaha asin pag-uuran magin man an mga preventive measures kaini.
Nagpagiromdom man ini sa publiko na magin maingat sa pigkukuahan nin tubig, dae maglusong sa mga baha lalo na an mga kaakian, asin imantenir an malinig na kapalibutan.
