LEGAZPI CITY—Nagpadara nin kasuratan an Albay Provincial Persons with Disability Affairs Office (PDAO) sa mga lokal na gobierno mapadapit sa pag-engganyar sa mga pribadong establisimiento asin sektor kan transportasyon na tanggapon an mga ID kan mga Persons With Disability (PWDs) sa provincia.
Segun ki Albay PDAO Officer Annecita Abion, sa intrevista kan Bombo Radyo Legazpi, nakapalaog digdi na tanggapon asin pabayaan na ma-avail kan mga PWD an saindang discount asin iba pang pribelihiyo sa paagi kan paggamit nin PWD ID.
En kaso man na bako tunay o peke an PWD ID, dapat na i-report ini sa kun saen na LGU an nakabugtak sa logo kan ID.
Pwedesir man ining ipaabot sa Department of Health (DOH) o sa opisina mismo kan Albay PDAO ngani na matabangan na ma-validate kun peke o lehitimo an sarong PWD ID.
Alagad kun sa sadiri sana suboot na assessment, halimbawa kan cashier, na dae pigtatawan nin discount huli sa pagdududa kan pagigin lehitimo kan ID pwedesir na pigbalgar kaini an karapatan kan sarong PWD sa pag-avail nin discount.
Sinabi kaini na bako responsibilidad kan mga PWD na patunayan na tunay an saindang ID.
Tinawan-duon man kan opisyal na an may responsibilidad sa pag-validate kan ID iyo enot an mga establishimento na nagtao nin discount asin dapat na magtaong aksyon kun duda na peke an PWD ID.
Mientrastanto, nagpagiromdom ini sa mga PWD ID holder na siertohon na bako expire an saindang ID siring man an pangapodan kaini sa mga establisimiento asin sektor kan transportasyon na pabayaang i-avail kan mga PWD an diskwento asin iba pang pribelihiyo na para sainda.
