LEGAZPI CITY — Tinawang-duon kan Albay Public Safety and Emergency Management Office (APSEMO) an poder kan mga taga-media sa pagtatao nin epektibo asin episyenteng impormasyon durante kan mga kalamidad.
Sa isinagibong disaster response seminar na inorganisar kan Kapisanan ng mga Brodkaster ng Pilipinas (KBP) Albay, ipig-eksplikar ni APSEMO Chief Dr. Cedric Daep na importante an papel kan media para sa public safety.
Dugang pa ni Daep na mas nagigin credible an pagbabariwas kan mga abiso sa paagi kan media.
Katakod kaini, tinukar man ni Daep an mga huma na nakapalibot sa rehiyong Bicol siring na sana kan tagmara, cold front, Inter Tropical Convergence Zone (ITCZ), Low Pressure Area (LPA), bagyo, habagat asin amihan, magin an thunderstorm.
Ipinasabot pa kan disaster official sa nasabing okasyon na mayor na obheto an matawanan nin bastanteng katukduan an mga nasa media tangarig na ma-cover an mga pangyayari sa lokalidad asin maiheras an mga kinakaipuhang impormasyon mantang pigrurumdom man an seguridad kan lambang-saro.
