LEGAZPI CITY- Dae mapugulan na magduda kan sarong municipal mayor sa Albay sa timing kan pagluwas kan Philippine Drug Enforcement Agency (PDEA) sa narco-list sa barangay level urog na sa paparaning pirilian sa Mayo 14.
Sa intrevista kan Bombo Radyo Legazpi ki Jovellar Mayor Jorem Arcangel, nangangalas ini kun nata dae ipigrelease an nasabing listahan antes pa man na magbukas an election period dawa pa sabihong national level an pag-anunciar kaini.
Suportado man ni Arcangel an pigmamawot kan Regional Peace and Order Council (RPOC) sa Bicol sa pamamayo ni Legazpi City Mayor Noel Rosal na magkondusir nin validation sa nasabing listahan mientras na klinaripikar na dakulang tabang man an impormasyon tangarig na magin giya tangarig na dae maraot an barangay structure.
Mientras tanto, napag-araman na an banwaan kan Jovellar an nangengenot sa bilog na Albay sa mga drug-cleared barangays kun saen naglalaom si Mayor Arcangel na 100% na talagang malinig an kada nasasakupang barangay.
