LEGAZPI CITY — Nakatalaang magkrear nin task force an provincial government of Albay kaibanan an Land Transportation Office (LTO) sa obhetong maresolberan an problema sa matinding traffic urog na sa banwaan kan Daraga asin ciudad kan Legazpi.
Ipighayag ni Governor Al Francis Bichara an nasabing plano kasabay kan Nationwide Simultaneous Release of Plates kan LTO Bicol na isinagibo kasuodma, Hulyo 5 sa ciudad kan Legazpi.
Segun sa gobernador, target kaini an “best solution” sa problema kun kaya nakatalaan man na mag-alokar nin pondo para sa mga gagamitong behikulo kan mga mabilog sa nasabing task force sa traffic management.
Pighihiling man na rason kan dakol na nagdadalagan na behikulo sa mga tinampo kan provincia an hibaba sanang installment fee para sa mga makua nin motorsiklo asin iba pang klase nin lunadan na puon P1,000 hasta P30, 000 an pinakahibaba.
Dugang pa ni Bichara na nagpapapiot man sa tinampo na enot nang isinairarom sa widening an ginibong parking space kan nagkapirang motorista.
Mientras tanto, hinagad kan gobernador an tabang ni dating Metropolitan Manila Development Authority (MMDA) chairman asin presenteng Presidential Adviser on Political Affairs Secretary Francis Tolentino para sa epektibong implementasyon kaini.
