LEGAZPI CITY- Mabale an probinsya kan Albay sa international crusade ngani na tapuson na an violence against women (VAW) sa Pebreroo 13.
Binansagan ining 1 Billion (Strike! Walk! Dance!) Rising for Justice Campaign na selebrasyon ngunyan na taon asin may temang “1B Rising for Revolution.”
Sa sarong meeting kaibanan an myembro kan GAD-TWG, sinabi ni Samalea na pupuunan an event sa paagi kan sarong parada puon sa Peñaranda Park hasta sa Bicol University (BU) commencement grounds kun sain magkakaigwa nin mass dance asin karantahan.
Sa hapon, matiripon an mga partisipantes sa BU Amphitheater ngani na ipahayag an saindang suporta ngani man na maingganyar an mga concerned agencies na ipagpadagos an kampanya.
Kan mahapot si Samalea kun nata 1 bilyon, sinabi kaini na saro sa kada tulong babayi sa kinaban an nagigin biktima nin kadahasan.
Kun kaya 1 bilyon suboot na babayi an nagkukurahaw nin hustisya.
Tinawan duon man kaini na aktibong maray an Pilipinas sa worldwide campaign asin signatory man kan Beijing Platform for Women.
Pig-iimbitaran man ni Samalea an gabos na magbale sa aktibidad sabay promesang pano ini nin mga surpresa.
Kan nakalihis na taon, magigirumduman na nagsagibo an Albay nin 18 diyas na kampanya puon Nobyembre 25 hasta Disyembre 12 ngani na magheras nin mga impormasyon para sa pagpuho kan VAW.
Mientrastanto, nakikipagkoordinar na an Albay GAD-TWG sa Bicol University, Bureau of Fire Protection (BFP) asin iba pang ahensya kan gobyerno ngani na plantsahon an gabos para sa siertong trayumpo kan event.
