LEGAZPI CITY — Ikinadisganar kan pamayuhan kan Philippine National Police sa Albay asin mga lokal na opisyal an bansag sa provincia bilang rape case capital kan Pilipinas.
Base ini sa nagluwas na datos kun sain an Albay an may pinakahalangkaw na rape incident sa bilog na nacion puon pa kan 2015 hasta sa ngonian.
Sa record kan PNP puon Enero ngonian na taon hasta sa presente, nag-abot sa 39 an nairehistrong kaso nin rape sa mga kababaihan kun sain pito digdi an sa Ligao, anom sa Guinobatan, parehong lima sa Legazpi City asin Polangui, apat sa Tabaco City, tulo sa Jovellar, tigduruwa sa Daraga, Camalig asin Pio Duran mantang tigsararong kaso man sa banwaan mga banwaan kan Bacacay, Sto. Domingo, asin Tiwi.
Mientras tanto, kabilugang ciento cincuenta y cinco man an kaso nin rape sa mga aki kun sain pinakadakol sa Legazpi City na may 28, sinundan kan Ligao na may 21, 20 sa Bacacay, 15 sa Daraga, 11 sa Tabaco City asin an ibang mga banwaan an dae malanglaw sa 10 kaso.
Bilang intervention, sinabi ni Pol. C/Insp. Arthur Gomez, tagapagtaram kan Albay PNP na naglilibot sinda sa mga harong-harong na igwang aki n a daragita ngani na matawan nin prayoridad sa pabahay kan Department of Social Welfare and Development (DSWD) ngani na magkaigwa nin sadiring kwarto an mga aking babaye.
Segun pa ki Gomez, an saindang lakdang an base naman sa halangkaw na numero kan incest rape urog na sa mga liblib na barangay sa provincia.
