LEGAZPI CITY – Nag-apela an provincial government of Albay sa mga private employers na tugutan maghalf-day ngonian na aldaw an saindang empleyadong bako man necessary an trabaho.
Segun ki Albay Governor Noel Rosal sa intrevista kan Bombo Radyo Legazpi na katuyuhan kan saiyang apela an nganing makauli tulos an mga pribadong obrero nganing maka-uli asin maka-preparar an mga ini sa posibleng huma ni bagyong Opong sa rehiyon Bicol.
Huli ta nasa preparation stage pa sana an provincia sa nagdadangadang na pangrarapado kan naunambitang raot nin panahon, nag-apela siya nganing dae man maka-abala sa mga importanteng trabaho kan mga private establishments arug na sana kan mga nasa bangko.
Mientrastanto, puga puga na man an saindang preparasyon asin pighayag niyang nagtetenir na nakabukas an Albay Public Safety and Emergency Management Office siring man an mga Disaster Risk Reduction and Management Office kan kaniya-kaniyang ciudad asin munisipalidad kan provincia.
Pigkompirmar man kan opisyal na igwa nang nagtetenir sa mga evacuation center partikular na sa banwaan kan Pioduran asin nakatalaang ilipat an mga pasyente kan sarong ospital huli sa maluya nang edipisyo.
Piglalaoman man ninda an mga kakalsadahan na dae maagihan huli sa pagbabaha na pwedesir magin resulta kan mga ibabagsak na mga pag-uuran.
Dae man ninda pighahale an posibilidad na magkaigwa liwat nin mga insidente kan pagrasay nin daga asin lahar flow.
Nangapodan si Gov. Rosal sa mga private employers na pagbigyan an saindang mga obrero na maka-preparar sa kaniya-kaniya nindang harong laban sa epekto ni bagyong Opong.
