LEGAZPI CITY– Tres mil na kahoy an itinanom sa pamitisan kan bulkan Mayon para sa ika-12 taon kan Alay-Lakad Tanom Kahoy Para sa Puso.
Taunan ining aktibidad sa syudad kan Legazpi na ipigsasagibo tuyong Valentine’s Day na obheto an ipahiling an pagkamoot sa kapalibutan sa paagi kan pagtanom nin mga kahoy.
Ngunyan na taon, pinartisiparan an aktibidad na ini kan mga empleyado kan LGU Legazpi, Philippine National Police (PNP) Bureau of Fire Protection (BFP) Philippine Coast Guard, Philippine Navy asin mga criminology trainees gikan sa Bicol College (BC.)
An Barangay Padang an napiling lugar para sa tre planting kun sain sigon ki Legazpi City Mayor Noel Rosal, katuyuhan nindang mamantinir an kagayunan kan watershed area sa extended danger zone area kan bulkan.
Dugang suboot an nasambitan na numero nin kahoy sa enot na nindang naitanom na 80,000 sa nakalihis na 11 taon.
Maogma an alkalde na nahihiling nya suboot na nagkakasararo an mga Legazpeño sa pagmantinir kan kagayunan kan mga kakahuyan sa syudad.
