LEGAZPI CITY- Nakalinyada na an mga aktibidades na isasagibo kan Provincial Veterinary Services kan Albay katakod kan selebrasyon kan World Rabies Day ngonian na aldaw, Setyembre 28.
Sa ekslusibong intrevista kan Bombo Radyo Legazpi ki Provincial Veterinarian Dr. Florencio Adonay, piglalaoman na an pakikisumaro kan mga local government units kan Albay.
Magkakaigwa man nin forum an nasabing opisina sa Daraga National High School na target an mga estudyante para sa public awareness kasabay man an isasagibong pagbakuna sa mga ayam.
Nasa 85, 000 naman na mga ayam sa provincia na nabakunahan o 79% kan kabilugan na labi sa 120, 000 dog population sa Albay.
Maogma man na ipigheras ni Dr. Adonay na hibaba an datos kan dog rabies puon Enero hasta Setyembre sa presenteng taon na lima sana an nairehistro mientras na wara pa man na kaso o casualty kan human rabies.
