LEGAZPI CITY- Balik na sa normal an biyahe asin operasyon kan UV Expess sa Legazpi Grand Terminal makalihis an holiday season.
Segun sa driver na si Lorenzo Salomon sa intrevista kan Bombo Radyo Legazpi na nakapagrehistro sana nin paglangkaw sa mga pasahero durante kan Disyembre 15 hasta Disyembre 31.
Alagad sa ngunyan, aminado ini na balik na liwat sa matumal na biyahe kaya dae man maasigurar an saindang ganansya.
An pigmamanehar na UV Express ni Salomon an kaibanan sa mga nasuspinde na unit kasunod kan nangyaring madugong aksidente sa Barangay Ilawod, Camalig makalihis mabangga nin truck.
Aminado ini na makalihis an aksidente, garing nagkaigwa man nin pagkahadit an mga pasahero.
Huli digdi, nangapudan si Salomon sa mga commuters na magtiwala sainda huli ta wara man na driver na mawot na maipahamak an saindang mga pasahero.
Kasabay kaini, pinayuhan man niya an mga kapwa drivers na siertuhon na nasa kondisyon an sadiri asin an behikulo antes na magmaneho ngani na maibitaran an anuman na aksidente.
