Nakakulong na ngonian an lalaki na pigsumbong kan sarong aking babae ki Presidente Ferdinand Marcos Jr. huli sa suboot pang-aabuso asin nanggigipit sa saindang komunidad sa Camarines Sur.
Sinabi ni PNP chief Police General Jose Melencio Nartatez Jr. na nagkondusir sinda nin on-site verification sa Camarines Sur katakod kan viral na post dapit sa reklamo kan sarong 11 anyos na babae.
Segun saiya, basado sa police records, sarong kasong panglulugos an isinangat kontra sa nasabing indibidwal kan 2023 asin presenteng piglilitis sa korte, kun sain nakakulong ngonian an akusado sa Tinangis Penal Farm.
Sa saiyang surat ki Marcos kan Marso 30, pigbuyagyag kan aking babae an suboot panlulugos na ginibo kan aki asin aide kan sarong barangay kagawad laban sa sarong kaiba nindang babae, siring man an mga pananakot asin panggigipit sa saindang komunidad.
Naghagad siya nin proteksyon asin nagpahayag kan saiyang kamawotan na ipadagos an saiyang pag-aadal nin salbado.
Sa simbag ni Marcos sa surat, pigbuyagyag kaini na nadagit siya asin haros maghibi kan mabasa an istorya kan aki.
Nagpromesa an presidente na mapadara nin mga pulis nganing panimbagon an mga responsable.
Handa man an presidente na suportaran an mga biktima, kaiba na an pagtabang sa saindang pag-adal.
Mientrastanto, kinumpirmar man kan Department of Social Welfare and Development (DSWD) na na-trace na ninda an estudyante asin iba pang mga menor de edad, asin presenteng nasa pangangataman kan mga social workers.
Sinabi ni Social Welfare Secretary Rex Gatchalian na matao an ahensya nin psycho-emotional counseling, financial assistance sa mga pamilya, asin suporta para sa legal na aksyon dapit sa kadahasan laban sa mga menor de edad.
