Kinumpirmar kan Iranian media na an aking babae, manugang na lalaki, asin makoapo ni Supreme Leader Ayatollah Ali Khamenei an nagadan sa mga airstrike na ginibo kan Estados Unidos asin Israel sa saiyang compound sa Tehran.
Susog sa mga bareta kan Fars News Agency asin iba pang local media sa Iran, nagadan sa airstrikes an mga miyembro kan pamilya kan lider.
Kinumpirmar an saindang pagkagadan makalihis na ihayag kan sarong reliable sources sa laog mismo kan harong kan Supreme Leader.
Ikinasa kan Estados Unidos asin Israel an joint combat operations sa Iran na may katuyuhan na pabagsakon an rehimen ni Ayatollah.
Sagkod ngonyan, dai pa nagpaluwas an kampo ni Khamenei nin opisyal na pahayag manungod sa saiyang sadiring kamugtakan, sa ibong kan enot nang ipigbareta ni Israel Prime Minister Netanyahu na igwa nin mga indikasyon na an Supreme Leader an nagadan man sa pag-atake.
Mientrastanto, ipigdoon kan nagkapirang opisyales kan Islamic Revolutionary Guard Corps (IRGC) na buhay pa si Ayatollah Khamenei asin an pahayag na siya gadan an parte sana kan “psychological warfare” kan Israel asin kan Estados Unidos.
