Ipigbubusol sa Kongreso an House Bill 5692 o Responsible and Empowered Adolescents Law (REAL) kan Akbayan Reform Bloc nganing mapugulan an pagdakol kan mga joven na nababados sa nacion.
Segun ki Akbayan Party-list Representative Perci Cendaña, kaipuhan baguhon an presenteng mga ley huli bako na ini epektibo sa pagresolbar kan nagdadakulang problema kan amay na pagbabados.
Segun saiya dae natutugunan kan mga polisiya sa sexual asin reproductive health an pangangaipuhan kan mga kajovenesan.
Tinawan-duon man kan lehislador na dapat itukdo nin tama asin pahewason an sexuality education sa mga eskwelahan nganing magkaigwa nin bastanteng kaaraman an mga kajovenesan.
Pangenot na obheto kan propwestong ley na tawan nin kakayahan an mga kajovenesan na maggibo nin responsableng desisyon mapadapit sa saindang reproductive health.
Nakasaad man digdi an pagpapaotob nin sexuality education sa mga komunidad na naaayon sa kultura, edad, asin pag-uswag kan mga kajovenesan.
