LEGAZPI CITY- Ipigduon ni Ako Bicol Partylist (AKB) Rep. Rodel Batocabe sa ekskusibong intrevista kan Bombo Radyo Legazpi, na dakol pang mga luho na kinakaipuhan na mapakarahay sa Anti-hazong bill kaya sarong magayon na lakdang an pagkaka aprubar kan House justice committee sa propuestong pagbabawal sa hazing.
Segun sa kongresista, tama sana na tawan nin responsibilidad an mga pamayo kan eskwelahan asin mga miyembro kan fraternities, sororities asin iba pang organisasyon na nagsasagibo nin hazing.
Katakod kaini, pigbuyagyag kan opisyal na pinaglalaoman na mas mapapakuog asin mapapadali an pagsakdal sa mga persona na imbwelto sa siring na kaso.
Sa ibong kaini, segun ki Batocabe, maski pa gibuhon na death penalty an kapadusahan kun padagos man giraray an pagsasagibo nin hazing asin wara man na madadakop, dae man magigin epektibo an ley.
Dugang pa kaini na kaya importante na maipahiling an pangil kan ley ngani na dae na madugangan pa an mga biktimang jovenes na nararaot an futuro.
Mientrastanto, nagtutubod an nasambitan na kongresista na pigsasagibo kan nagkapira an siring na aktibidad huli sa pagtubod na kun nakulugan sa paagi kan hazing asin difisil na makalog sa sarong grupo o organisasyon, madidifisilan man na maghali an mga ini huli sa saindang commitment.
