LEGAZPI CITY- Inomaw kan Presidential Anti-Corruption Commission (PACC) an boluntaryong pagsusumitir ni Agriculture Secretary Emmanuel Piñol sa komisyon para sa lifestyle check asin pagpirma kan bank waivers.
Sinabi ni PACC Commissioner Manuelito Luna sa intrevista kan Bombo Radyo Legazpi, bihira na magkaigwa nin siring kaining pangyayari kun kaya maapod ining “historic” asin unprecedented.
Nagpapahiling man suboot ini kan makusog na mensahe sa seryosong paglaban kan gobierno tangarig na mapuho na an graft and corruption.
Pigsasaluduhan man ni Luna an nasabing lakdang kasabay kan pagtataong-duon na aasisteran tulos nin aksyon sa pag-obserba sa pagbuhay-buhay ni Piñol asin consistency sa checking kan assets, liabilities asin iba pang pagsadiri kan cabinet member.
Afuera man ki Piñol, dae man suboot maibitaran na mapahanga kan opisyal sa ginibong pagdemitir ni dating Peace Secretary Jesus Dureza makalihis na maprobaran an sala kan duwang subordinates na pagpapahiling sana suboot nin delicadeza.
Inengganyar man kan opisyal an iba pang mga government officials na sundan an nagin lakdang ni Pinol urog na kun wara man talagang pigtatago asin totoo an pagseservicio-publiko.
