LEGAZPI CITY- Piglalaomang mareresibe na ngonian na Hunyo kan mga economically-displaced farmers sa nakaaging pag-aalburoto kan bulkang Mayon an promesang tabang hale sa Department of Agriculture (DA).
Napag-araman sa nagin intrevista kan Bombo Radyo Legazpi ki Albay Provincial Agriculturist Cherryl Rebeta na nagkaigwa na nin orientation sa enot na apat na local government units (LGUs) an mga conduit banks sa release kan loan.
Kaibanan sa mga nasabing lugar an ciudad kan Ligao, mga banwaan kan Oas, Sto. Domingo asin Camalig na saro sa mga pinaka-naapektaran kan mga aktibidades kan nasabing bulkan mantang pighahalat na man an orientation sa limang lugar pa.
Segun pa ki Rebeta na nakalagak na sa conduit banks kan DA an pondo para sa Survival and Recovery (SURE) Loan kun saen makakaresibe an kada apektadong paraoma kan P25, 000 na babayadan sa laog kan duwang taon.
Enot naman na ipigpromesa ni Agriculture Secretary Manny Piñol na warang sisingilon na interes asin collateral para sa nasabing loan na parte kan P100 million na pondong ipigtama kan ahensya.
Magigirumduman na rinibong paraoma an naapektaran kan Mayon eruption crisis makalihis na masulo kan mga pinaghalong lava, mainit na abo asin iba pang volcanic materials na hale sa Mayon an mga produktong pang-agrikultura na nasa laog kan danger zones.
