LEGAZI CITY – Hustisya an pangapudan ngonyan kan agom ni Elwin Mangampo sarong incumbent Barangay Kagawad na residente kan P2, Brgy. 1, Pioduran, Albay.
Pigtutubudang iligal na inarestar an leader kan Lambat Bicol na si Elwin, makalihis suboot tanuman an harong nin mga badil asin granada kan mga otoridad.
Segun ki Ana Mangampo sa intrevista kan Bombo Radyo Legazpi, alas-3:00 kan maagahun kan mag-abot an mga kapulisan sa saindang harong asin pighapot kun igwa nin midbid na kagawad.
Huli ta amay na naglawod an agom na si Elwin, ipigturo an harong kan mga kapitbahay na saro man na kagawad asin inibanan digdi an mga otoridad.
Alagad pagbalik ni Ana sa saindang harong para mag-ihi nahiling na bantay-sarado na ini kan mga kapulisan magin an saiyang hiro.
Napag-araman na an mag-agom man sana an nakaistar sa saindang harong huli ta wara man sindang aki.
Alas-9:00 na kan mag-abot si Mangampo na inabangan man kan mga kapulisan sa baybayon kan dagat asin tulos na binasahan nin search warrant na pirmado ni Ligao City, Albao RTC Branch 11 Judge Edwin Ma-alat kasabay kan paghalughog sa saindang harong.
Digdi na ikinakigkig ni Ana kan igwang makua na mga badil asin pampasabog sa saiyang baduan urog pang piparakay pa sana suboot ini kan bangging ito asin wara man nin nahiling na mga armas.
Dakula an pagtubod kaini na warang rason an saiyang agom para magtago nin armas huli ta wara man ining kaiwal urog pang bistong sarong maray na kagawad sa saindang komunidad.
