Nagpatanid an Philippine Institute of Volcanology and Seismology (Phivolcs) na pwedesir magpadagos nin pirang semana sagkod sarong bulan an mga aftershock makalihis an magnitude 7.8 na linog na nagtama sa Sarangani kan aga nin Lunes, Hunyo 8, 2026.
Segun sa ahensya, alas-7:37 nin aga kan nagtama an makusog na linog sa banwaan kan Maasim, Sarangani. Nanggaling suboot ini sa paghiro kan Cotabato Trench.
Sa pinakahuring datos nag-abot na sa labi 130 aftershocks ang nairehistro kan ahensya. An pinakamakusog digdi an may kusog na magnitude 6.7.
Mantang kadaklan sa mga aftershock an maluluya sinabi kan Phivolcs na may posibilidad man liwat na makaeksperyensya nin mas makukusog na pagyugo sa mga masunod na aldaw.
Piinag-iingat man an publiko na dae tulos magbalik sa saindang harong o sa baybayon maski gari diit sana an enot na hukol huli posible pa suboot mas dakula an maaabot kan mga masunod na hukol.
Mientrastanto naghihiro na an mga ahensya kan gobierno para sa rescue asin relief operations. Sinugo man an Department of Social Welfare and Development na maghanda nn tabang para sa mga apektadong residente asin siertohon an maayos na evacuation centers.
Nagsagibo naman nin Department of Public Works and Highways sa mga kalsada, tulay, asin iba pang importante na imprastraktura nganing masierto ma ligtas asin maagihan an mga ini.
Supendido man an mga klase sa mga apektadong lugar mantang padagos na inaayos asin sinusuri ang sitwasyon.
Inabisuhan man kan ahensyaan mga residente na surion na maray an kondisyon kan saindang mga harong bago magbalik, urog na kun may nahilngna danyos makalihis an makusog na linog.
