LEGAZPI CITY-Itinalaga sina Lanao del Sur 1st District Rep. Zia Alonto Adiong asin Kabataan Partylist Rep. Renee Co an napili bilang opisyal na tagapagtaram kan Kamara para sa impeachment trial ni Bise Presidente Sara Duterte sa Senado.
Kinumpirmar ini ni Lead Prosecutor Jinky Luistro sa sarong press conference ngonian na Mayo 19, 2026.
Segun ki Luistro, an duwang nabanggit na opisyal an maasikaso kan mga pahayag para sa panel kan mga piskal o taga-usig kan mababang kapulungan.
Si Adiong, na pinuno man kan House committee on suffrage asin bisto bilang miyembro kan “Young Guns” bloc, nag-promisa na ilalatag an mga ebidensya na igwang malinaw, patas, asin transparent para sa interes kan publiko.
Mientrastanto, sinabi man ni Co, saro sa mga pinakajoven na mambabatas gikan sa minoriya asin Makabayan bloc, na tutukan niya an pagpaliwanag kan accountability process asin importansya kan paglilitis sa mga namamanwaan, partikularmente sa mga jovenes.
Marurumduman na nahahampang si VP Sara Duterte sa mga akusasyon nin maling paggamit kan pondo, panunuhol, dai maipaliwanag na kayamanan, asin pananakot sa buhay ni Presidente Ferdinand Marcos Jr., First Lady Liza Araneta-Marcos, asin dating House Speaker Martin Romualdez.
An paglilitis sa Senado bilang impeachment court, iyo an magigin huring pormal na plataporma kan Bise Presidente ngani idepensa an saiyang sadiri antes magdesisyon an mga senador kun igwa nin bastanteng ebidensya ngani mahale siya sa pwesto bilang Bise Presidente.
