LEGAZPI CITY—Nagkundusir an grupong Adbokasining Albay nin sarong charity auction para makalikom nin mga pondo para sa stray animals sa probinsya kan Albay.
Segun ki Adbokasining Albay Head Zach Montejo, sa intrevista kan Bombo Radyo Legazpi, na kan nahiling ninda an post na masarado na an Albay Animal Rescue and Adoption kun saen ini an nagtatabang sa mga stray animals sa ciudad naisip ninda na sinda na man an matabangan.
An saindang charity auction nangyari kan Miyerkules, Pebrero 19, kun saen nagpartisipar man digdi an mga local artists asin performers.
An nasambit na aktibididad nagkaigwa nin pagkakataon para sa mga partisipante na magpartisipar sa pig-aapod na bidding kun saen an nalikom digding pondo an mapapaduman sa Albay Animal Rescue and Adoption.
Mientrastanto, dugang ni Montejo sa mga nag-aataman nin ikos o ayam na ini ipakapon asin dae pagpabayaan na yaon pirme sa luwas an saindang ataman na mga hayop huli ta mabubugtak ini sa peligro.
Dugang digdi nagpagiromdom man ini sa mga motorista na en kaso makahiling sinda nin stray animals sa tinampo na dae ninda ini pagkulugan.
