Inihayag kan presenteng kalihim kan Department of Justice na si Sec. Jesus Crispin Remulla, na igwa suboot na sarong aktibong Heneral kan Pulisya an imbwelto man sa isyu kan ‘missing sabungeros case’.
Segun sa nasabing Justice Secretary, an naunambitan na opisyal kan Philippine National Police an siyang nagtabang sa mga suspek sa pagkawara kan mga sabungero.
Pigdesignar suboot siya bilang Regional Director alagad nanindugan na bako siyang kwalipikado sa nasabing posisyon.
Saiyang ipigheras na sa pagkakalipat kan heneral na ngonian an regional director na an pig-iba pa kaini an mga suspek bilang parte kan saiyang opisina.
Alagad sa ibong kaini, dae pa pigbubuyagyag o pigshare ni Justice Secretary Remulla an pangaran kan heneral sa presente.
Afuera kan aktibong heneral, sinambit man kan kalihim an itinaong suspension ki dating Philippine National Police Criminal Investigation and Detection Group Director General Romeo Macapaz.
Kun saen si Justice Secretary Jesus Crispin Remulla nagpahayag kan saiyang kaogmahan sa pag-isyu kan National Police Commission sa opisyal nin 90-day preventive suspension.
Pagdoon kaya kan kalihim na may pagporbar suboot na baguhon an teorya kan imbestigasyon sa pagkawara kan mga sabungero.
Mientrastanto, inihayag man ni Department of Justice Prosecutor General Richard Anthony Fadullon na ngoniang semana na piglalaoman an pag-isyu kan subpoena manungod sa ‘missing sabungeros case’.
Kan matapos suboot an ‘evaluation’ sa reklamong isinunad kan mga kaanak kan nawawara, kasunod na kaini an pagpapadara nin ‘subpoena’ sa mga respondents.
Kabale digdi an negosyanteng si Charlie ‘Atong’ Ang na magigirumdumang pinahimutikan an pagkaka-imbwelto sa isyu.
