Dagdag pa sa mga problema para sa mga residentes sa mga apektadong lugar iyo an liwat na pagtuga kan mahibog na abo hale sa Bulkang Kanlaon kan Biyernes nin aga, Pebrero 27, 2026.
An plume an nagpapahiling na aktibo pa an bulkan makalihis an nakaaging katamtaman na pagtuga kaini kan Huwebes na banggi.
Padagos an pagbantay kan PHIVOLCS sa estado kan bulkan nganing masyerto an kaligtasan kan mga nakapalibot na komunidad.
Inaabisuhan man an publiko na magtenir na alerto asin magsunod sa mga abiso na pigpapaluwas kan mga lokal na gobyerno asin ahensya kan gobyerno.
Nagpapadagos an pagbabantay kan mga otoridad sa posibleng dugang na aktibidad kan bulkan kasabay kan pagpagiromdom sa mga residente na likayan an mga delikadong lugar na nasa laog kan Permanent Danger Zone.
An abo nakaabot sa La Castellana, La Carlota City, San Enrique, Pontevedra, Hinigaran, Isabela, Kabankalan City, San Carlos City, Himamaylan City, Binalbagan, asin Cauayan, Negros Occidental.
Mientrastanto, sa mga lugar kan Bago City asin Moises Padilla, nanotaran an parong nin asupre sa nagkapirang barangay, asin an iba nag-ebakwar na sa saindang mga harong, partikular na sa La Carlota asin La Castellana.
Sa intrevista kan Star FM Bacolod ki Jane V. Caña, sarong paratukdo hale sa Caliling Elementary School sa Cauayan, Negros Occidental, naghiras ini na bago pa sana ninda naeksperyensyahan an sitwasyon na ini sa saindang lugar.
Sinabi niya na sa paghona ninda nagluya an amihan, na iyo an rason kun nyata nakaabot sa sainda an ashfall.
