LEGAZPI CITY—Nakatalaang gibohong learning centers para sa mga estudyanteng apektado kan aktibidad kan bulkang Mayon an mga abandonadong housing units sa relocation sa San Vicente, Tabaco City.
Segun ki 1st District of Albay Representative Cong. Krisel Lagman-Luistro, sa intrevista kan Bombo Radyo Legazpi, plano ining gibohon na learning centers para sa 1st grade sagkod grade six na mga estudyante kan apektado kan pag-alburoto kan bulkan huli sa wara nang naggagamit kan mga ini.
Ipigtrabaho na ini kan nasa 100 indibidwal na na-employed sa irarom kan Tulong Panghanapbuhay sa Ating Disadvantaged/Displaced Workers (TUPAD) program.
Dugang kan kongresista na posible ining matatapos sa enot na semana ngunyan na bulan kan Pebrero kun sain makakatapos sinda nin 9 units nin learning centers.
Mientrastanto, nakatalaan man na mag-organisar an nagkapirang young leaders sa ciudad nin libreng pasine asin pakawat sa mga evacuation centers sa Tabaco asin Malilipot nganing makapagtao nin entertainment sa mga residenteng apektado kan nagpapadagos na aktibidad kan nasambitang bulkan.
