Inihayag kan DTI Bicol, an saindang bagong proyekto na Service and Repair Enterprises Geotagging.
Segun ki Ruben R. Sombon, Consumer Protection Division Chief, sa intrevista kan Bombo Radyo Legazpi, na sa paagi kan QR code na ikakabit sa Maharlika Highway, mahihiling kan mga motorista an pinakaharaning accredited repair shop kun sinda marautan sa byahe.
Segun ki Sombon, enot na beses ining ipapatupad kan DTI katabang an LTO, PNP, DPWH asin iba pang ahensya.
Katuyuhan kaini na mabawasan an paghadit kan mga motorista asin matabangan man an mga lehitimong repair shops na igwa nin accreditation.
Sa ngonian nasa 200 hasta 300 accredited shops na an nakalaog sa sistema kan DTI Bicol.
Poon sa masunod na semana, magdedistribwer na an DTI nin tarpaulin na igwa nin QR code sa mga PNP outpost, gasoline stations asin fast food chains sa Maharlika Highway.
Pigpayuhan man an mga motorista na i-download na an QR code sa Facebook page kan DTI antes magbyahe ngonian na UNDAS asin Pasko.
