LEGAZPI CITY-Nakatalaang isumiter kan House prosecution panel an saindang pormal na offer of evidence sa impeachment court antes an deadline saagang Biyernes, Oktubre 23, segun ki Batangas Rep. Gerville Luistro.
Kasunod kaini, magkakaigwa nin 10 aldaw an kampo ni Bise Presidente Sara Duterte nganing magsumiter nin mga komento o pagkontra sa iprinesentar na ebidensya kan piskalya.
Kabali sa mga iprinesentar na ebidensya, iyo an mga bank records, tax, asin corporate na may relasyon sa mga alegasyon nin dae maipaliwanag na yaman laban sa Bise Presidente.
An pagsumiter kan ‘Formal offer of evidence’ piglalaoman na matatapos an pagpresentar kan evidencia kan prosecution antes an masunod na yugto kan impeachment trial.
Nagpromesa man si Luistro na isusumite sa Office of the Ombudsman an natipon na evidencia kontra sa Bise Presidente, na nanindugan na dae ini masasayang sa ibong kan pagbawi kan tulo sa apat na artikulo kan impeachment.
Mientrastanto, pinahimutikan ni House impeachment spokesperson Robert Ace Barbers an mga alegasyon na pighihidali an impeachment trial ni Bise Presidente Sara Duterte, antes an nakatalaan na pagbisita ni US President Donald Trump sa Pilipinas ngani mag-atendir sa ASEAN summit.
Segun ki Barbers, nakabase an paglilitis sa pinagkasunduan na iskedyul kan prosekusyon asin depensa makalihis an pre-trial conference kun saen pinag-olayan an mga testigo asin ipipresentar na mga ebidensya.
Nanindugan man House prosecution panel na warang pamumulitika sa trial asin katuyuhan sana kaini na panimbagon an mga opisyales kan gobyerno, asin wara suboot sindang kapangyarihang hidalion an proseso kan impeachment trial.
Mientras tanto, an paglilitis nakatalaang magpadagos sa Nobyembre 9 pagkatapos na bawion an tulo sa apat na artikulo sa impeachment.
