LEGAZPI CITY- Naka blue alert status an provincia kan Catanduanes katakod kan pinagbabantayan na raot nin panahon.
Segun ki Catanduanes Provincial Disaster Risk Reduction and Management Office Chief operations Officer Bobby Monterola sa intrevista kan Bombo Radyo Legazpi na on call an gabos na mga personahe asin preparado na magrespunde kun kinakaipuhan.
Partikular na pinag-aandaman kan provincia an outer rainband na posibleng magdara nin mga pag-uran sa island province.
Sa ibong na lado, pighihiling na makakatabang man an mga pag-uran para sa mga paraoma ngani na magkaigwa nin patubig sa saindang mga pananom.
Mientras tanto, sinabi ni Monterola na pinaka pinaghahandaan ninda an duwa pang raot nin panahon na nasa luwas kan Philippine Area of Responsibility na posibleng magdara nin mas malalang epekto sa provincia kan Catanduanes.
Pinayuhan man kan opisyal an publiko, urog na an mga biyahero na bantayan an kamugtakan kan panahon asin planuhon an saindang biyahe ngani na dae maulang kun magkakaigwa nin kanselasyon kan biyahe.
