Magpapaluwas an Department of Labor and Employment (DOLE) nin apat na labor advisories sa Nobyembre ngani na maprotehiran an mga obrero kontra sa matinding init na dara kan pinag-aantisiparan na super El Niño.
Segun ki DOLE Secretary Francis Tolentino, kaibanan sa mga pangenot na tututukan an mga obrerong komon na nakabalad sa saldang.
Saro sa mga planong lakdang an pagpapakusog na benepisyo sa paagi kan Employees’ Compensation Commission (ECC) sa mga obrerong magkakahelang huli sa matinding init mantang pigagampanan an saindang trabaho.
Sakop kaini an mga kwalipikadong empeyado sa pribado asin pampublikong sektor.
Pigsasapinal man k an ahensya an mga polisiyang may kinaaraman sa heat index, kaibanan an posibleng pagsususpinde sa trabaho kun makaabot na sa peligrosong antas an temperatura.
Katakod kaini, makikipag-meeting man an DOLE sa mga kumpanya, organisasyon asin representante kan delivery riders asin platform drivers ngani na tukaron an posibleng paghahalwag sa saindang trabaho puon alas-dose nin udto hasta alas-tres nin hapon, kun sain matindi an init kan saldang.
Kaibanan man sa mga planong advisory an pagsusulog nin komportable alagad disenteng bado sa trabaho asin pagpapaotob kan staggered working hours o pagbabago sa oras kan paglaog asin pag-uli kan mga empleyado.
Naglalaom man ni Tolentino na makikipagtabangan an mga employer sa mga lakdang para sa kaligtasan asin salud kan saindang mga empleyado.
