LEGAZPI CITY- Tinuyaw kan sarong communications professor an ginibong pangmemenos kan sarong grupo nin mga kalalakihan sa saindang podcast sa mga nasa autism spectrum.
Ini an kasunod kan isyu kan pagmenos kan nagkapirang personalidad sa aki ni Kris Aquino na si Josh.
Segun ki UP Diliman College of Media and Communication Prof. Danilo Arao sa intrevista kan Bombo Radyo Legazpi na dae dapat matawan dalan an anuman na nakakakulog sa ibang indibidwal.
Paliwanag kaini na sensitibo an orolay kan mga margenalized asin underepresented, alagad an pinakamalalang kritisismo iyo an hali sa mga igwang poder o impluwensya na nangmemenos kan iba.
An mga siring na isyu an dae suboot dapat na pigagamit sa komedya.
Huli digdi, sinabi ni Arao na tama sana an ginibo kan producer na ikanselar an dae na i-renew an kontrata kan programa o podcast kan nasabing grupo.
Dagdag pa kaini na kun talagang sinsero an mga imbweltong personalidad sa paghagad nin dispensa, dapat na ilatag an saindang mga aksyon ngani na dae na mautro pa an insidente.
