LEGAZPI CITY- Mas pinahiwas kan lokal na gobyerno kan Daraga an pag-adaptar kan cashless payments sa mga merkado kan banwaan sa paagi kan Paleng-QR Ph program, obhetong matawan nin mas convenient asin seguradong paagi nin pagbayad an mga parabakal.
Segun ki Daraga Market Administrator Themis Lobete sa intrevista kan Bombo Radyo Legazpi, labi sa 50 na mga paratinda sa night market asin labi sa 30 sa regular market an naggagamit na kan programa, kun sain pwedesir bayadan an mga binakal sa paagi kan pag-scan kan mga QR code na nakadisplay sa mga stall.
Inisyatiba suboot ini na nagsusuporta sa nasyonal na direktiba asin sa estratehiya sa pinansyal na inklusyon kan gobyerno para sa 2022–2028, susog sa Joint Memorandum Circular No. 1 na ipinaluwas kan Department of the Interior and Local Government (DILG) asin kan Bangko Sentral ng Pilipinas (BSP).
An mga produktong pwedeng bakalon sa paagi nin cashless payment kabali an mga gulay, bonay, dried fish, asin iba pang dried goods, siring man an mga kakanon na ipinapabakal sa night market.
Alagad, kaipuhan pa man giraray an access sa internet o mobile data tanganing magamit an paaging ini nin pagbayad. Sinabi ni Lobete na pig-aaram ngonian kan lokal na gobyerno an posibilidad na magtao nin libreng Wi-Fi sa lugar.
Sagkod ngonian, wara pang naireport na reklamo manungod sa signal sa night market.
Nangapodan man ini sa mga parabakal asin paratinda na ingatan an saindang mga gadyet tanganing maibitaran an paghabon o iba pang dai marahay na mga pangyayari, dawa ngani an mga security personnel asin mga pulis nakadeploy harani sa lugar.
Sa presente, an Daraga Night Market igwa nin 449 na rehistradong paratinda, mas halangkaw sa nakaaging 236. Nag-ooperar ini poon alas-7:00 nin banggi sagkod alas-3:00 nin aga asin nag-aakomodar man nin mga paratinda hale sa pagtaraid na banwaan.// via Bombo Benj Gravito
