LEGAZPI CITY- Nagtutubod an Albay Provincial Youth Development Office na makakatabang kun maibitar muna an mga menor de edad sa paggamit nin social media.
Ini an sa tahaw kan pigbubusol na pagpapaotob nin ban sa mga wara pang 18-anyos sa social media.
An nasabing propuesto an kasunod man liwat kan mga nairerehistrong insidente nin kadahasan sa nagkapirang mga lugar sa nacion, na pigkaka imbweltuhan kan mga joven, partikular kan nagkapirang menor de edad.
Segun ki Albay Provincial Youth Development Office head Rhondon Ricafort sa intrevista kan Bombo Radyo Legazpi na sa presente, mas makakarhay kun linawon muna kan Kamara asin Senado an pinal na bersyon kun total ban sa 13-anyos pababa o 18-anyos pababa.
Aminado kaya an opisyal na an komunikasyon an pinaka enot asin basic na rason sa paggamit kan social media, alagad ini man an nagreresulta sa pag download sa manlain lain na mga aplikasyon na nakaka impluwensya sa mga joven.
Dagdag pa ni Ricafort na komon na nawawaran man nin kontrol an mga magurang sa online activities kan saindang mga kaakian, urog na kun naiimbwelto ini sa nagkapirang bako marhay na mga application.
