Pigkakarkulo na nasa P817.87 milyon an suboot unexplained wealth ninda Vice President Sara Duterte asin agom na si Atty. Manases “Mans” Carpio puon kan 2022 hasta 2025, basado sa pagsusuri kan prosecution forensic expert na si Atty. Alexander Cabrera sa saindang financial records.
Segun ki Cabrera, kaibanan sa saiyang pagsusuri an mga dae naideklarar na cash, personal asin real properties, ganansya kan mag-agom asin mga business interest.
Pigsasaalang alang man suboot an saindang ari-arian sa irarom kan absolute community of property, huli ta wara saiyang nahiling na prenup agreement o judicial decree of separation of property.
Inihayag ni Cabrera na igwang mga bank account an mag-agom na dae naideklarar sa Statement of Assets, Liabilities and Net Worth (SALN) ni Duterte.
Itinuro man kan forensic expert an suboot kuwestiyonableng banking transactions sa sarong aldaw asin dae naideklarar na personal asin real properties na nagkakantidad nin milyones taun-taon puon 2022-2025.
Kaibanan man sa computation ni Cabrera an suboot ganansya asin assets hali sa mga business interest na CALE88, Metro City asin Gencorp.
Pigkakarkulo kaini na an kabilugan na dae naideklarar na ganansya asin assets kan mag-agom an uminabot sa labi sa P800 milyon an kabilugan.
