LEGAZPI CITY-Nagpahayag nin pagkahadit an dating Gabriela Women’s Party Representative na si Arlene Brosas sa suboot nagkukusog na mga pag’atake sa online laban sa House prosecutor asin San Juan City Representative na si Ysabel Maria “Bel” Zamora.
Susog ki Brosas, an Artificial Intelligence asin deepfakes pigrereport na ginagamit sa paggibo nin peke asin nakakaraot na content na nagpupuntirya ki Zamora, kabali an sekswal na materyal na pwedisir makaraot kan saiyang reputasyon asin makakompromiso kan saiyang kaligtasan.
Sinabi ni Brosas na an siring na mga content posibleng may katuyuhan na ipasupog, i-discredit, asin pasilensyuhon si Zamora, siring man an pagtakot saiya mantang ginigibo niya an saiyang mga trabaho bilang saro sa mga piskal sa impeachment trial ni Vice President Sara Duterte.
An dating mambabatas nag-asegurar na an pampublikong diskurso dapat na magtutok sa mga kahaputan asin isyung iprinesentar sa korte nin impeachment—siring man sa mga bagay nin tranparency asin paninimbagan—imbes na sa personal na mga pag’atake.
Nangapudan si Brosas na punduhon na an paggamit nin AI asin deepfakes nganing ikasupog o takuton an mga kababaihan na nagtataram asin naggigibo kan saindang mga trabaho.
