LEGAZPI CITY-Nabuyagyag na labi sa P469 milyon, na suboot gikan sa gobierno kan China asin mga corporations na nakabase sa China, an napaduman sa mga entidad na konektado ki Vice President Sara Duterte asin sa saiyang agom na si Atty. Manases “Mans” Carpio.
Kabali ini sa mga ihinayag ni dating Senador Antonio Trillanes susog sa sarong press conference, kasunod kan saiyang kahagadan sa piskalya na i-excuse siya sa pagtestigo sa impeachment trial kan Bise Presidente.
Segun ki Trillanes, an “Tapang at Malasakit Alliance for the Philippines”—sarong pundasyon na itinatag ni Bise Presidente Sara Duterte—an suboot nakaresibe nin nasa P150 milyon.
Basado sa mga dokumento na iprinesentar ni Trillanes, an pondo hale Embassy of the People’s Republic of China asin itinagama suboot para sa pagtugdok nin 13 classroom buildings sa Davao City, sa irarom kan kasunduan na ginibo sa Chinese Embassy.
Mientrastanto, labi sa P319 milyon suboot an napaduman sa Cale88 Foods Corporation, sarong kumpanya na konektado sa agom kan Bise Presidente na si Mans Carpio.
Ipig-assert man ni Trillanes na igwa nin mga seryosong kahapotan manungod sa pinaghahalean asin paghiro kan mga pondong ini, partikularmente huli sa mga transaksyong pinansyal na imbuelto an China.
Para ki Trillanes, bako sana ini manungod sa kwarta kundi imbuelto an implikasyon sa national security, huli ta konektado an mga entidad na imbuelto an Bise Presidente.
Bilang simbag, an kampo kan Bise Presidente nagpaluwas nin sarong pahayag na pigbabasura an mga akusasyon ni Trillanes bilang “malicious fabrications” kontra ki VP Sara Duterte.
