LEGAZPI CITY-Nanotaran kan Philippine Coast Guard (PCG) an mga sakayang pandagat kan mga China sa Bajo de Masinloc—na mas bisto bilang Scarborough Shoal—mantang nagbabarewas nin subsidiya sa gasolina asin pagkakan sa mga parasirang Pilipino kan Huwebes.
Sa sarong pahayag, kan PCG Spokesperson para sa West Philippine Sea na si Admiral Jay Tarriela, sarong bapor na panggera kan People’s Liberation Army Navy (PLA-N), tulong sakayan kan China Coast Guard, asin tulong sakayan kan Chinese maritime militia an nahiling sa lugar.
Idinagdag pa ni Tarriela na pig-agyat kan sarong Chinese warship an Philippine Coast Guard (PCG) Piper Navajo aircraft sa paagi kan pag-radyo.
Nagsimbag man an aircraf sa paagi nin pagsabi na ini nagkokondusir nin legal na maritime patrol sa laog kan maritime zones kan Pilipinas, susog sa ley internasyunal.
Dagdag pa ni Tarriela, na nagkondusir nin maritime patrol an Philippine Coast Guard sa Bajo de Masinloc ngani suportaran an padagos na Kadiwa ng Bagong Bayaning Mangingisda na lakdang na pinangenotan kan Bureau of Fisheries and Aquatic Resources.
Mientrastanto, 35 na mga parasira na Pilipino an nakaresibe nin suplay nin diesel asin pagkakan hale sa Philippine Coast Guard.
Magigirumdoman na kan 2016, an Permanent Court of Arbitration sa The Hague, nagdesisyong pabor sa Pilipinas manungod sa mga pagakio kan China sa West Philippine Sea (WPS), na nagdedeklara na ini “warang nin legal na basehan”—na sarong desisyon na padagos na dai pigmidbid kan China.
