LEGAZPI CITY—Matrayumpong naarestar kan kapulisan an sarong regional-listed wanted person kan Police Regional Office 4A CALABARZON sa bisa kan warrant of arrest sa Barangay Resurreccion, San Fernando, Masbate.
Binisto an suspek na si alyas “Marco”, 32-anyos, lalaki, sarong parasisira asin residente kan nasabing banwaan.
Iniluwas an warrant of arrest ni Hon. Raquel Ventura Aspiras-Sanchez, Presiding Judge kan Fourth Judicial Region, Branch 3, Tagaytay City, Cavite, sa kasong statutory rape na warang pigrekomendang piyansa.
Kinundusir an operasyon kan 502nd Maneuver Company, Regional Mobile Force Battalion 5, San Fernando Municipal Police Station, Naic Municipal Police Station, Regional Intelligence Division 5 Tracker Team, Masbate 1st Provincial Mobile Force Company, asin Masbate Police Provincial Office Provincial Intelligence Unit.
Tulos na dinara an suspek sa San Fernando MPS para sa magkakanigong dokumentasyon asin disposisyon.
